ଭାରତର ମହାନ ସ୍ୱାଧୀନତା ସଂଗ୍ରାମୀ ତଥା ଆଦିବାସୀ ସମାଜର ପ୍ରତିଷ୍ଠିତ ନେତା ବୀର ବିର୍ସାମୁଣ୍ଡାଙ୍କ ୧୫୦ ତମ ଜୟନ୍ତୀ ସୁନ୍ଦରଗଡ଼ରେ ମହାସମାରୋହ ଏବଂ ଉତ୍ସାହର ସହ ପାଳିତ ହୋଇଯାଇଛି। ତାଙ୍କର ତ୍ୟାଗ ଓ ବଳିଦାନକୁ ସ୍ମରଣ କରିବା ପାଇଁ ଆୟୋଜିତ ଏହି କାର୍ଯ୍ୟକ୍ରମରେ ବିଭିନ୍ନ ରାଜନୈତିକ ଏବଂ ସାମାଜିକ ସଂଗଠନର ବହୁ ମାନ୍ୟଗଣ୍ୟ ବ୍ୟକ୍ତି ଯୋଗ ଦେଇଥିଲେ। ସାରା ସହରରେ ବୀର ବିର୍ସାମୁଣ୍ଡାଙ୍କ ପ୍ରତି ଉତ୍ସାହ ଓ ଶ୍ରଦ୍ଧାର ବାତାବରଣ ଦେଖିବାକୁ ମିଳିଥିଲା।
ବୀର ବିର୍ସା ମୁଣ୍ଡା ଜୟନ୍ତୀ କମିଟି ଦ୍ୱାରା ଆୟୋଜିତ ଏହି କାର୍ଯ୍ୟକ୍ରମ ଅବସରରେ ସୁନ୍ଦରଗଡ଼ ବିଧାୟକ ଯୋଗେଶ କୁମାର ସିଂହ, ପୂର୍ବତନ ବିଧାୟିକା ତଥା ବିଜେପି ରାଜ୍ୟ ଉପ-ସଭାନେତ୍ରୀ କୁସୁମ ଟେଟେ, ପୌର ଅଧ୍ୟକ୍ଷା ତନୟା ମିଶ୍ର, ଉପାଧ୍ୟକ୍ଷ ଲଲାଟେନ୍ଦୁ ପରିଡ଼ା, ଲକ୍ଷେଘର ସମାଜ ସଭାପତି ପ୍ରଫୁଲ୍ଲ ସୁନ୍ୟାନି,ସିନେ ତାରକା ପ୍ରଦୀପ ଦତ୍ତ, କମିଟି ସଭାପତି ପଞ୍ଚା ବାରଲା,ସମ୍ପାଦକ ସୁଖଲାଲ ମୁଣ୍ଡା, ଏବଂ ଜୟ ଜଗନ୍ନାଥ ଟ୍ରକ୍ ମାଲିକ ସଂଘ ସଭାପତି ସଞ୍ଜୟ ନନ୍ଦ,ଉପଦେଷ୍ଟା ଜଟିଆ ମୁଣ୍ଡା ମଞ୍ଚାସିନ ଥିବାବେଳେ ମୁଖ୍ୟ ବକ୍ତା ଭାବରେ ସୁନ୍ଦରଗଡ଼ ସ୍ବୟଂଶାସିତ ମହାବିଦ୍ୟାଳୟର ଇତିହାସ ଅଧ୍ୟାପିକା ସୁସ୍ମିତା ଭୋଇ ପ୍ରମୁଖ ମଞ୍ଚାସିନ ହୋଇ ବୀର ବିର୍ସା ମୁଣ୍ଡାଙ୍କ ବୀର ଗାଥା ଉପରେ ଆଲୋକପାତ କରିଥିଲେ ।
ସ୍ଥାନୀୟ ହସ୍ପିଟାଲ ଛକରୁ ଏକ ବିରାଟ ଶୋଭାଯାତ୍ରାରେ ଅତିଥି ମାନେ ବାହାରି ଡିଆରଡିଏ ଛକ ଦେଇ ପୁରୁଣା ବସଷ୍ଟାଣ୍ଡ ଠାରେ ଥିବା ଡ଼ ଭୀମରାଓ ବାବା ସାହେବ ଆମ୍ବେଦକରଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରି ନାରୀ କଲ୍ୟାଣ କେନ୍ଦ୍ର ଛକରେ ଥିବା ବୀର ବିର୍ସାମୁଣ୍ଡାଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିବା ପରେ ସ୍ଥାନୀୟ ମାଦ୍ରି କାଲୋ ଭବନରେ ଅନୁଷ୍ଠିତ ଏକ ସଭାକାର୍ଯ୍ୟ ରେ ସମ୍ମିଳିତ ହୋଇଥିଲେ। ସଭାରେ ଅତିଥି ମାନେ ବିର୍ସାମୁଣ୍ଡାଙ୍କ ସାହସିକତା, ତାଙ୍କର ଦେଶପ୍ରେମ ଏବଂ ଆଦିବାସୀଙ୍କ ଜଳ, ଜଙ୍ଗଲ ଓ ଜମି ଅଧିକାର ପାଇଁ ଲଢ଼େଇ ଉପରେ ଆଲୋକପାତ କରିଥିଲେ। ତାଙ୍କର କ୍ରାନ୍ତିକାରୀ ଆଦର୍ଶ ଆଜିର ଯୁବପିଢ଼ି ପାଇଁ ଚିରକାଳ ପ୍ରେରଣାର ଉତ୍ସ ହୋଇ ରହିବ ବୋଲି ସମସ୍ତେ ମତପ୍ରକାଶ କରିଥିଲେ। ସୁନ୍ଦରଗଡ଼ରେ ଏହି ମହାନ ଜୟନ୍ତୀ କାର୍ଯ୍ୟକ୍ରମ ସଫଳତାର ସହ ସମାପନ ହୋଇଥିଲା। ସଭାକାର୍ଯ୍ୟ ଶେଷରେ ମୁଣ୍ଡା ସମାଜ ସାଧାରଣ ସମ୍ପାଦକ ଟିଙ୍କୁ ମୁଣ୍ଡା ଧନ୍ୟବାଦ ଅର୍ପଣ କରିଥିଲେ ।
Total views : 905