ଭେଡ଼ାବାହାଲରେ ଆଦାନୀର ମେଗାପ୍ଲାଣ୍ଟ: ନୂଆଆଶା, ପୁରୁଣାଆଶଙ୍କା

ସୁନ୍ଦରଗଡ଼: ଭେଡ଼ାବାହାଲରେ ଆଧୁନିକ କୋଇଲା ଗ୍ୟାସିକରଣ ଟେକ୍ନୋଲୋଜି ବ୍ୟବହାର କରି କୋଇଲାରୁ କେମିକାଲ୍ ତିଆରି ପାଇଁ ପ୍ଲାଣ୍ଟ ପ୍ରତିଷ୍ଠା କରିବ ଆଦାନୀ ଗ୍ରୁପର ଆଦାନୀ ଏଣ୍ଟରପ୍ରାଇଜେସ । ୩ ହଜାର ଏକର  ଜମିରେ ପ୍ରତିଷ୍ଠା ହେବାକୁ ଥିବା ଏହି ପ୍ଲାଣ୍ଟ ପାଇଁ କମ୍ପାନୀ ୮୪ ହଜାର କୋଟି ଟଙ୍କା ନିବେଶ କରିବ ବୋଲି ସୂଚନା ମିଳିଛି। ଏହି ପ୍ରକଳ୍ପକୁ ରାଜ୍ୟ ସରକାର ଚଳିତ ଅକ୍ଟୋବର ମାସରେ ଅନୁମୋଦନ କରିଥିବା ଜଣାପଡ଼ିଛି । ଏହା ଭାରତର ସବୁଠୁ ବଡ଼ ଶିଳ୍ପ ପ୍ରତିଷ୍ଠାନଗୁଡ଼ିକ ମଧ୍ୟରୁ ଗୋଟିଏ ହେବ ବୋଲି ଅନୁମାନ କରାଯାଉଛି ।ପୂର୍ବରୁ ଏହି ଅଞ୍ଚଳର କନ୍ଦାବାହାଲ,କିରେଇ,ରୁପିଡ଼ିହି,ଭେଡାବାହାଲର କିଛି ଅଂଶକୁ ନେଇ ଏନଟିପିସି ଅଲଟ୍ରା ମେଗା ପାୱାର ପ୍ଲାଣ୍ଟ  ସ୍ଥାପନ ପାଇଁ ଜମି ଅଧି ଗ୍ରହଣ କରାଯାଇଥିଲା ହେଲେ ସେହି ପ୍ରକଳ୍ପ ଘରେ ନ ପଶୁଣୁ ଚାଳ ବାଜିଲା ପରି ଝୁଣ୍ଟି ପଡିଲା । ସେଥିପାଇଁ ଏହି ନୂତନ ପ୍ରକଳ୍ପ ପାଇଁ ଲୋକେ ଦ୍ବନ୍ଦରେ ଅଛନ୍ତି,ପୂର୍ବରୁ ଅଧିଗ୍ରହଣ କରାଯାଇଥିବା ଜମିରେ ଉକ୍ତ ପ୍ରକଳ୍ପ ହେବ ନାପୁଣିଥରେ ଜମି ଅଧି ଗ୍ରହଣ ହେବ ।

ଏହି ମେଗା ପ୍ଲାଣ୍ଟଟି ସୁନ୍ଦରଗଡ଼ ଜିଲ୍ଲା ସଦର ବ୍ଲକର ଭେଡ଼ାବାହାଲ ଅଞ୍ଚଳରେ ସ୍ଥାପିତ ହେବା ପାଇଁ ଯୋଜନା କରାଯାଇଥିବା ଜଣା ପଡିଛି । କୋଇଲାରୁ ଆଧୁନିକ ଟେକ୍ନୋଲୋଜୀରେ ଗ୍ୟାସ ବାହାର କରାଯାଇ  ବିଭିନ୍ନ ଶିଳ୍ପରେ ବ୍ୟବହାର ପାଇଁ ଉଦ୍ଦିଷ୍ଟ ରସାୟନରେ ପରିଣତ କରାଯିବ । ଫଳରେ ଏହି ପ୍ଲାଣ୍ଟରେ ମେଥାନଲ୍, ଆମୋନିଆ ଓ ୟୁରିଆ ପରି ଗୁରୁତ୍ଵପୂର୍ଣ୍ଣ ରାସାୟନିକ ପଦାର୍ଥ ଉତ୍ପାଦିତ ହେବ । ଏହି ପ୍ରକଳ୍ପ ମାଧ୍ୟମରେ ପ୍ରାୟ ୩୬ ହଜାର ଲୋକଙ୍କ ପାଇଁ ପ୍ରତ୍ୟକ୍ଷ ଓ ପରୋକ୍ଷ ଚାକିରି ସୁଯୋଗ ସୃଷ୍ଟି ହେବାର ସରକାର ଘୋଷଣା କରିଥିବା ବେଳେ ଦାଦନ ଚାଲାଣ ଓ ବେକାରୀ ସମସ୍ୟା ରେ ଉବୁଟୁବୁ ହେଉଥିବା ସୁନ୍ଦରଗଡ଼ର ଭାଗ୍ୟ ସତରେ ବଦଳିବ ତାହା ସମୟ କହିବ। ଏହି କାରଖାନାକୁ ପରିଚାଳିତ କରିବା ପାଇଁ ୧୧ ଶହ ମେଗାୱାଟର ଏକ ନିଜସ୍ଵ କ୍ୟାପଟିଭ୍ ପାୱାର ପ୍ଲାଣ୍ଟ ମଧ୍ୟ ପ୍ରତିଷ୍ଠା କରିବ ଅଦାନୀ ଗୃପ ।

ଏହି ବୃହତ କୋଇଲା ପ୍ରକଳ୍ପଟି ଓଡ଼ିଶା ସରକାରଙ୍କ ଦ୍ବାରା କାର୍ଯ୍ୟକାରୀ ହେଉଥିବା ଶିଳ୍ପନିବେଶ କାର୍ଯ୍ୟକ୍ରମ ଅନ୍ତର୍ଗତ ଏକ ବିଶାଳ ଓ ସଫଳ ଉଦ୍ୟମ ବୋଲି କୁହାଯାଉଛି । ଚଳିତ ଅକ୍ଟୋବର ଶେଷରେ ରାଜ୍ୟ ସରକାର କାନକ୍ଳେଭ ମାଧ୍ୟମରେ  ୧.୪୬ ଲକ୍ଷ କୋଟି ଟଙ୍କାର ୩୩ଟି ଶିଳ୍ପ ପ୍ରସ୍ତାବକୁ ଅନୁମୋଦନ କରିଥିଲେ । ଏହା ଓଡ଼ିଶାକୁ ଭାରତର ଗୁରୁତ୍ୱପୂର୍ଣ୍ଣ ଶିଳ୍ପ ଓ ଉନ୍ନତ ଉତ୍ପାଦନ ଶିଳ୍ପର ହବ ଭାବରେ ଗଢ଼ି ତୋଳିବାର ପ୍ରୟାସର ଅଂଶ ବିଶେଷ ହୋଇ ପାରିବ । ଏହି ପ୍ଲାଣ୍ଟ ପ୍ରତିଷ୍ଠା ହେଲା ପରେ ଶିଳ୍ପ ପାଇଁ ଆବଶ୍ୟକୀୟ ଗ୍ୟାସ ରପ୍ତାନି ଉପରେ ଅନ୍ୟ ଦେଶ ଉପରେ ନିର୍ଭରଶିଳତା ହ୍ରାସ ପାଇବ ବୋଲି ଆଶା କରାଯାଉଛି ।

ପୂର୍ବରୁ ଏଠାରେ ଏକ ବୃହତ ପାୱାର ପ୍ଲାଣ୍ଟ ର ସ୍ବପ୍ନ ଧୂଳିସାତ ହୋଇ ଲୋକେ ଜମିହରା ହୋଇଥିବା ବେଳେ ସତରେ କ’ଣ ଏହି କାରଖାନା ସ୍ଥାପନ ହୋଇ ପାରିବ ବୋଲି ସଚେତନ ମହଲ ପ୍ରଶ୍ନ କରୁଛନ୍ତି । ଲୋକଙ୍କ ମନରେ ସନ୍ଦେହ ଉଙ୍କି ମାରିବାର ଯଥାର୍ଥତା ପଛରେ କାରଣ ମଧ୍ୟ ରହିଛି । କାରଣ ଗତ ୧୪ ବର୍ଷ ପୂର୍ବେ ଭେଡ଼ାବାହାଲ ନିକଟବର୍ତ୍ତୀ ରୁପିଡିହି, କୋପସିଂହା,କିରେଇ,କନ୍ଦାବାହାଲ, ଲଙ୍କାହୁଡ଼ା ଗାଁର ପ୍ରାୟ ୨୩ ଶହ ଏକର ଜମି ଅଲଟ୍ରା ମେଗା ପାୱାର ପ୍ଲାଣ୍ଟ ପ୍ରତିଷ୍ଠା ପାଇଁ ଅଧିଗ୍ରହଣ ହୋଇଥିଲା । କିନ୍ତୁ ଆଜି ପର୍ଯ୍ୟନ୍ତ ତାହା ହୋଇନାହିଁ । ଲୋକେ ଭୂମିହରା ହେଲା ପରେ ମଧ୍ୟ ବିସ୍ଥାପିତ ନହେବା କାରଣରୁ ଅସନ୍ତୁଷ୍ଟ ଅଛନ୍ତି ।କିଛି ମାସ ପୂର୍ବରୁ ମହାନଦୀ କୋଇଲା ଖଣି ଦ୍ୱାରା ଏଠାରେ ବିଦ୍ୟୁତ ଉତ୍ପାଦନ ପ୍ରକଳ୍ପ ପ୍ରତିଷ୍ଠା ହେବ ବୋଲି ପ୍ରଚାର ହୋଇଥିଲା । ଅନ୍ୟ ପଟେ ଅଧିଗ୍ରହଣ ହୋଇଥିବା ଜମିକୁ ଏମସିଏଲ୍ ର ସମ୍ବନ୍ଧିତ କମ୍ପାନୀ ମହାନଦୀକୁ ହସ୍ତାନ୍ତର କରିବା ପାଇଁ ପଦକ୍ଷେପ ଆରମ୍ଭ ହେଲା, କିନ୍ତୁ ବର୍ତ୍ତମାନ ସୁଦ୍ଧା ତାହା ହୋଇପାରିଲା ନାହିଁ । ଜମି ହସ୍ତାନ୍ତର ହେଲେ ମହାନଦୀ ବେସିନ ଏଠାରେ ୪ ହଜାର ମେଗାୱାଟ କ୍ଷମତା ବିଶିଷ୍ଟ ତାପଜ ବିଦ୍ୟୁତ ପ୍ରକଳ୍ପ ପ୍ରତିଷ୍ଠା କରିବ ବୋଲି ଯୋଜନା ଥିଲା । କିନ୍ତୁ ସେଥିରେ ମଧ୍ୟ କୌଣସି ଅଗ୍ରଗତି ଦେଖାଯାଉନାହିଁ । ତେଣୁ ଏଠାରେ କୌଣସି ନୂତନ ପ୍ରକଳ୍ପ ଘୋଷଣା ହେଲେ ତାହା କାର୍ଯ୍ୟକ୍ଷମ ହେବ କି ନାହିଁ ବୋଲି ସ୍ଥାନୀୟ ଲୋକଙ୍କ ମଧ୍ୟରେ ସଂଶୟ ପ୍ରକାଶ ପାଉଛି ।

ତେବେ ସତରେ କ’ଣ ଏହି କାରଖାନା ହେବ ବୋଲି ସଚେତନ ମହଲ ପ୍ରଶ୍ନ କରୁଛନ୍ତି । ଲୋକଙ୍କ ମନରେ ସନ୍ଦେହ ଉଙ୍କି ମାରିବାର ଯଥାର୍ଥତା ପଛରେ କାରଣ ମଧ୍ୟ ରହିଛି । କାରଣ ଗତ ୧୪ ବର୍ଷ ପୂର୍ବେ ଭେଡ଼ାବାହାଲ ନିକଟବର୍ତ୍ତୀ ରୁପେଡିହି, କୋପସିଂହା, ଲଙ୍କାହୁଡ଼ା ଗାଁର ୨୩ ଶହ ଏକର ଜମି ଅଲଟ୍ରା ମେଗା ପାୱାର ପ୍ଲାଣ୍ଟ ପ୍ରତିଷ୍ଠା ପାଇଁ ଅଧିଗ୍ରହଣ ହୋଇଥିଲା । କିନ୍ତୁ ଆଜି ପର୍ଯ୍ୟନ୍ତ ତାହା ହୋଇନାହିଁ । ଲୋକେ ଭୂମିହରା ହେଲା ପରେ ମଧ୍ୟ ବିସ୍ଥାପିତ ନହେବା କାରଣରୁ ଅସନ୍ତୁଷ୍ଟ ଅଛନ୍ତି ।