ସୁନ୍ଦରଗଡ ଜିଲ୍ଲା ଲେଫ୍ରିପଡ଼ା ବ୍ଲକ ଅନ୍ତର୍ଗତ ବଣ ପାହାଡ଼ ଘେରା ପ୍ରାକୃତିକ ସୌନ୍ଦର୍ଯ୍ୟ ଭରା ଗୁଣ୍ଡିଆଡିହି ଗ୍ରାମ ପଞ୍ଚାୟତର ଦଳକିଝରନ ଗ୍ରାମର ରଘୁପଡ଼ା ଗ୍ରାମର ଫୁଲ ବାଗ ନାମକ ଜଣେ ବିଧବା ବୃଦ୍ଧା ଦୀର୍ଘ ଦିନ ହେବ ସରକାରୀ ସହାୟତା ପାଇବାରୁ ବଞ୍ଚିତ ହୋଇ ଅସହାୟ ଅବସ୍ଥାରେ ଜୀବନ ବିତାଉଛନ୍ତି ।
ପ୍ରାପ୍ତ ସୂଚନାରୁ ପ୍ରକାଶ ଯେ, ଦୀର୍ଘ ବର୍ଷ ପୂର୍ବେ ଫୁଲଙ୍କ ସ୍ୱାମୀ ବସନ୍ତ ବାଗଙ୍କ ମୃତ୍ୟୁ ହୋଇସାରିଛି। ସ୍ୱାମୀଙ୍କ ମୃତ୍ୟୁ ପରେ ତାଙ୍କର କେହି ପୁଅ କିମ୍ବା ଝିଅ ନ ଥିବାରୁ ବୃଦ୍ଧା ଅଧିକ ଅସହାୟ ହୋଇ ପଡ଼ିଛନ୍ତି।ତାଙ୍କର ସମୁଦାୟ ତିନି ଏକର ପୈତୃକ ଚାଷ ଜମି ଥିବାବେଳେ ତାଙ୍କ ସ୍ୱାମୀଙ୍କ ଭାଗରେ ଥିବା ପ୍ରାୟ ଏକ ଏକର ଜମିକୁ ତାଙ୍କ ପୁତୁରା ଭାଗଚାଷ ମାଧ୍ୟମରେ ଚାଷ କରିଥାନ୍ତି। ଚାଷରୁ ଯାହା କିଛି ମିଳେ, ସେଥିରେ ବୃଦ୍ଧା ବହୁତ ଦୁଃଖ କଷ୍ଟରେ ନିଜର ଗୁଜୁରାଣ ମେଣ୍ଟାଇଥାନ୍ତି। ତାଙ୍କର ଏଭଳି ଦୟନୀୟ ଆର୍ଥିକ ଅବସ୍ଥା ସତ୍ତ୍ୱେ ସେ ସରକାରଙ୍କ ପକ୍ଷରୁ ମିଳୁଥିବା ସର୍ବନିମ୍ନ ସହାୟତାରୁ ମଧ୍ୟ ବଞ୍ଚିତ ହୋଇ ରହିଛନ୍ତି।କେବଳ ସରକାରଙ୍କ ପକ୍ଷରୁ ଦିଆଯାଉଥିବା ଚାଉଳ ଛଡ଼ା ତାଙ୍କୁ ଆଉ ସରକାରୀ ସୁବିଧା ମିଳୁନାହିଁ ।ବାରମ୍ବାର ଆବେଦନ କଲେ ମଧ୍ୟ ବିଧବା ଭତ୍ତା ମିଳିପାରି ନାହିଁ ଏପରିକି ତାଙ୍କର ରହିବା ପାଇଁ ଏକ ପକ୍କାଘରଟିଏ ମଧ୍ୟ ମିଳିପାରି ନାହିଁ। ବର୍ତ୍ତମାନ ବୃଦ୍ଧାଙ୍କ ବୟସ ଅଧିକ ହୋଇଥିବାରୁ ଏକୁଟିଆ ଜୀବନ ବିତାଇବା ଅତ୍ୟନ୍ତ କଷ୍ଟକର ହୋଇପଡ଼ିଛି।ଏଭଳି ଏକ ଅସହାୟ ବିଧବା ବୃଦ୍ଧାଙ୍କୁ ତୁରନ୍ତ ସରକାରୀ ସହାୟତା ଯୋଗାଇ ଦେବାର ତୁରନ୍ତ ବ୍ୟବସ୍ଥା କରିବା ପାଇଁ ସ୍ଥାନୀୟ ବୁଦ୍ଧିଜୀବୀ ଏବଂ ଗ୍ରାମବାସୀଙ୍କ ତରଫରୁ ଦାବି ହୋଇଛି।
Total views : 46