ମହିଳା ସୁରକ୍ଷା ଓ ମଣିଷ ଚାଲାଣ ରୋକିବାକୁ ନେଇ କିଞ୍ଜିରକେଲା ଥାନାରେ ବୈଠକ

ସୁନ୍ଦରଗଡ଼ ଜିଲ୍ଲାର ଉପାନ୍ତବର୍ତ୍ତୀ ଅଞ୍ଚଳରେ ଦିନକୁଦିନ ନାରୀ ନିର୍ଯ୍ୟାତନା,ହତ୍ୟାକାଣ୍ଡ,ଦୁଷ୍କର୍ମ ଭଳି ସଂଗୀନ ଅପରାଧମାନ ଘଟି ଚାଲିଥିବା ବେଳେ ଏହାର ନିରାକରଣ ପାଇଁ କିଞ୍ଜିରକେଲା ପୋଲିସ ଷ୍ଟେସନ ପରିସରରେ ଅଂଚଳର ଜନସାଧାରଣ,ଗ୍ରାମବାସୀ, ବିଭିନ୍ନ ସମ୍ପ୍ରଦାୟର ବରିଷ୍ଠ ଓ ନେତ୍ରୁ ସ୍ଥାନୀୟ ବ୍ୟକ୍ତି ଏବଂ ପୋଲିସ ଅଧିକାରୀମାନଙ୍କୁ ନେଇ ଏକ ‘ଆମ ପୋଲିସ’ ବୈଠକ ଅନୁଷ୍ଠିତ ହୋଇଯାଇଛି। ଏହି ବୈଠକରେ ଉପସ୍ଥିତ ଥିବା ସମସ୍ତେ ସକ୍ରିୟ ଭାବରେ ଅଂଶଗ୍ରହଣ କରି ବିଭିନ୍ନ ପ୍ରସଙ୍ଗ ଉପରେ ବିସ୍ତୃତ ଭାବରେ ଆଲୋଚନା କରିଥିଲେ।

ବୈଠକର ମୁଖ୍ୟ ଆଲୋଚନା ବିଷୟ ମଧ୍ୟରେ ମହିଳାମାନଙ୍କ ସୁରକ୍ଷା ଏବଂ ମଣିଷ ଚାଲାଣ ରୋକିବା ଉପରେ ବିଶେଷ ଗୁରୁତ୍ୱ ଦିଆଯାଇଥିଲା। ଏହା ବ୍ୟତୀତ କିଂଜିରକେଳା  ଅଞ୍ଚଳର ଅନ୍ୟାନ୍ୟ ସ୍ଥାନୀୟ ସମସ୍ୟା ଉପରେ ମଧ୍ୟ ଆଲୋଚନା ହୋଇଥିଲା।ଅଞ୍ଚଳରେ ଶାନ୍ତି ବଜାୟ ରଖିବା ପାଇଁ ପ୍ରତ୍ୟେକ ଅଞ୍ଚଳବାସୀ ଓ ବିଭିନ୍ନ ସମ୍ପ୍ରଦାୟର ସହଯୋଗ ଅତ୍ୟନ୍ତ ଜରୁରୀ ବୋଲି ପୋଲିସ ବିଭାଗର ଅଧିକାରୀ ମାନେ ମତବ୍ୟକ୍ତ କରିଥିଲେ। ସାଧାରଣ ଲୋକେ କିପରି ସନ୍ଦେହଜନକ କାର୍ଯ୍ୟକଳାପ ବିଷୟରେ ତୁରନ୍ତ ପୋଲିସକୁ ଜଣାଇବେ, ସେ ବିଷୟରେ ବୈଠକରେ ଉପସ୍ଥିତ ଥିବା ନାଗରିକମାନଙ୍କୁ ସଚେତନ କରାଯାଇଥିଲା। ବିଶେଷକରି ମହିଳା ଓ ଶିଶୁଙ୍କ ପ୍ରତି ହେଉଥିବା ଅନ୍ୟାୟ,ଅପରାଧ ଏବଂ ଅଞ୍ଚଳରେ ହେଉଥିବା ମଣିଷ ଚାଲାଣ ଭଳି ସଙ୍ଗୀନ ଘଟଣାକୁ ରୋକିବା ପାଇଁ ଗୋଷ୍ଠୀଗତ ସହଯୋଗର ଆବଶ୍ୟକତା ଉପରେ ଆଲୋକପାତ କରାଯାଇଥିଲା।ଯଦି କୌଣସି ବ୍ୟକ୍ତି କିମ୍ବା ଗୋଷ୍ଠୀ ସମ୍ବନ୍ଧରେ କିଛି ଅପରାଧିକ,ଅନୈତିକ କାର୍ଯ୍ୟକଳାପ ସନ୍ଦେହ କିମ୍ବା ସୂଚନା ମିଳେ, ତେବେ ତୁରନ୍ତ ଥାନାରେ ଜଣାଇବା ଉଚିତ୍। ସୂଚନା ଦେଉଥିବା ବ୍ୟକ୍ତିଙ୍କ ନାମ ଗୋପନୀୟ ରଖାଯିବା ସହ ତ୍ୱରିତ ପଦକ୍ଷେପ ଗ୍ରହଣ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୋଲିସ ବିଭାଗ ପକ୍ଷରୁ ଜନସାଧାରଣଙ୍କୁ ପ୍ରତିଶୃତି ପ୍ରଦାନ କରାଯାଇଛି।ଏହି ‘ଆମ ପୋଲିସ’ ବୈଠକ ଅଞ୍ଚଳବାସୀ ଏବଂ ପୋଲିସ ମଧ୍ୟରେ ଉତ୍ତମ ସମ୍ପର୍କ ସ୍ଥାପନ କରିବା ଦିଗରେ ଏକ ସକାରାତ୍ମକ ପଦକ୍ଷେପ ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି।