୧୩ ଟି ଜିଲ୍ଲାର ୪୪ ତହସିଲରେ ସବ୍‌ ରେଜିଷ୍ଟ୍ରି କାର୍ଯ୍ୟାଳୟ ଆରମ୍ଭ

ପୂର୍ବରୁ କେବଳ ସବରେଜିଷ୍ଟ୍ରି ଗୁଡିକରେ ଜମି କିଣା-ବିକା ହେଉଥିଲା। ଆଗକୁ ସବୁ ତହସିଲରେ ହେବ ଜମି କିଣାବିକା। ଶାସନ ବ୍ୟବସ୍ଥାକୁ ଲୋକଙ୍କ ଦୁଆର ମୁହଁକୁ ନେବା ହେଉଛି ସରକାରଙ୍କର ମୁଖ୍ୟ ଲକ୍ଷ୍ୟ। ତେଣୁ ରାଜ୍ୟର ସବୁ ତହସିଲରେ ସବ୍ରେଜିଷ୍ଟ୍ରେସନ ଅଫିସ୍ ଖୋଲିବ। ଦୂରଦୂରାନ୍ତକୁ ଯାଇ ଜମି ପଞ୍ଜୀକରଣ କରିବାର ଅସୁବିଧାରୁ ଲୋକଙ୍କୁ ମୁକ୍ତି ମିଳିବ।ଅତି କମ ସମୟରେ ଓ ସହଜରେ ଦାଖଲ – ଖାରଜ(ମ୍ୟୁଟେସନ) ହୋଇ ପଟ୍ଟା ମିଳି ପାରିବ । ରାଜସ୍ୱ ସଂଗ୍ରହରେ ଉନ୍ନତି ହେବା ସହିତ ଜମି ପଞ୍ଜୀକରଣ ସହଜ ହେବ ବୋଲି ମୁଖ୍ୟମନ୍ତ୍ରୀ କହିଛନ୍ତି।ଶନିବାର ଲୋକସେବା ଭବନରେ ଆୟୋଜିତ ସ୍ୱତନ୍ତ୍ର କାର୍ଯ୍ୟକ୍ରମରେ ୧୩ ଟି  ଜିଲ୍ଲାର ୪୪ ତହସିଲରେ ନୂଆ ଉପନିବନ୍ଧନ ବା ସବ୍ରେଜିଷ୍ଟ୍ରି କାର୍ଯ୍ୟାଳୟକୁ ଉଦ୍ଘାଟନ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି, ପର୍ଯ୍ୟାୟକ୍ରମେ ରାଜ୍ୟର ସବୁ ତହସିଲରେ ସବ୍ରେଜିଷ୍ଟ୍ରିଅଫିସ୍ ଖୋଲିବ ବୋଲି କହିବା ସହିତ ଲୋକଙ୍କୁ ସମ୍ମାନର ସହିତ ଉତ୍ତମ ସରକାରୀ ସେବା ଯୋଗାଇଦେବାକୁ ରାଜସ୍ବ ବିଭାଗ କର୍ମଚାରୀମାନଙ୍କୁ ପରାମର୍ଶ ଦେଇଛନ୍ତି । ଆମର ମୂଳ ଲକ୍ଷ୍ୟ ଶାସନ ବ୍ୟବସ୍ଥାକୁ ସ୍ବଚ୍ଛ, ପାରଦର୍ଶୀ ଓ ଲୋକାଭିମୁଖୀ କରିବା। ଯେତେଦୂର ସମ୍ଭବ ଶାସନ ବ୍ୟବସ୍ଥାକୁ ଲୋକଙ୍କ ଦୁଆର ମୁହଁକୁ ନେବା। ଖୁସିର କଥା ଟେକ୍ନୋଲୋଜି ଜରିଆରେ ଜନସାଧାରଣ ଘରେ ବସି ଅନେକ ସରକାରୀ ସେବା ସୁବିଧାରେ ପାଇ ପାରୁଛନ୍ତି। ନିକଟରେ ଜମିଜମା ପଞ୍ଜୀକରଣ ପାଇଁ ସ୍କଟ୍ ବୁକିଂ ନିମନ୍ତେ ଇ-ରେଜିଷ୍ଟ୍ରେସନ ମୋବାଇଲ୍ ଆପର ଶୁଭାରମ୍ଭ ହୋଇଥିଲା। ଏଥିରେ ସହଜରେ ସ୍ଲଟ ବୁକିଂ କରିବା ସହିତ ଇସି ଏବଂ ଅନ୍ୟାନ୍ୟ ଜରୁରି କାଗଜପତ୍ର ମିଳିପାରୁଛି। ସ୍ମାର୍ଟ ସର୍ଭିଲେନ୍ସ ଜରିଆରେ ସମସ୍ତ ସବ୍ରେଜିଷ୍ଟ୍ରି ଅଫିସକୁ ନିରୀକ୍ଷଣ କରାଯାଉଛି। ଏହା ଦ୍ୱାରା କର୍ମଚାରୀମାନଙ୍କର ସମୟାନୁବର୍ତ୍ତିତା ଏବଂ ପାରଦର୍ଶିତାକୁ ସୁନିଶ୍ଚିତ କରାଯାଇ ପାରୁଛି। ଉପ ନିବନ୍ଧନ କାର୍ଯ୍ୟାଳୟକୁ ଦୁର୍ନୀତିମୁକ୍ତ ଓ ମଧ୍ୟସ୍ଥମୁକ୍ତ କରିବା ଦିଗରେ ଏହି ସ୍ମାର୍ଟ ସଭିଲେନ୍ସ ବ୍ୟବସ୍ଥା ଖୁବ୍ ଉପଯୋଗୀ ହୋଇପାରୁଛି।

ଜମି କିଣାବିକା ସମୟରେ ଲୋକମାନେ ହନ୍ତସନ୍ତ ନହେବା ପାଇଁ ବିଭାଗରେ ସଂସ୍କାର ଅଣାଯାଇଛି। ରାଜସ୍ବ ରେକର୍ଡକୁ ସଂଶୋଧନ କରିବା ସହ କ୍ୟାସଲେସ୍ ଅର୍ଥ ନେଣ-ଦେଶ ଏବଂ ତ୍ବରିତ ପଟ୍ଟା ପ୍ରଦାନ ପାଇଁ ବ୍ୟବସ୍ଥା ହେଉଛି। ବ୍ୟବସ୍ଥାକୁ ସହଜ, ସରଳ କରିବା ଲାଗି ତହସିଲ ଓ ସବ୍ରେଜିଷ୍ଟ୍ରି ଅଫିସକୁ ଏକାଠି କରାଯାଇଛି। ଅନେକ ଦିନ ଧରି ପାର୍ଟ ପୁଟ ବିକିବା ବ୍ୟବସ୍ଥା ବନ୍ଦ ଥ‌ିବାରୁ ଜନସାଧାରଣଙ୍କ ସୁବିଧା ପାଇଁ ବ୍ୟବସ୍ଥାରେ ପରିବର୍ତ୍ତନ କରାଯାଇ, ଏହାକୁ ଅନୁମୋଦନ ଦିଆଯାଇଛି। ଏହାଦ୍ଵାରା ଜନସାଧାରଣ ସୁବିଧାରେ ଜମି କିଣାବିକା କରିପାରୁଛନ୍ତି ବୋଲି  ରାଜସ୍ବ ମନ୍ତ୍ରୀ ସୁରେଶ ପୂଜାରୀ କହିଥିଲେ, ।ଏହି କାର୍ଯ୍ୟ କ୍ରମରେ ବିଭାଗୀୟ ଅତିରିକ୍ତ ମୁଖ୍ୟ ଶାସନ ସଚିବ ଦେଓ ରଞ୍ଜନ କୁମାର ସିଂହ ସ୍ଵାଗତ ଭାଷଣ ଦେଇଥିବା ବେଳେ ରାଜସ୍ବ ରେଜିଷ୍ଟ୍ରେସନ ଇନ୍‌ସ୍ପେକ୍ଟର ଜେନେରାଲ ପି ଅନ୍ଵେଷା ରେଡୀ ଧନ୍ୟବାଦ ଦେଇଥିଲେ। ଅନ୍ୟମାନଙ୍କ ମଧ୍ୟରେ ରାଜସ୍ୱ ବିଭାଗର ଅଧିକାରୀ ଓ କର୍ମଚାରୀମାନେ ଉପସ୍ଥିତ ଥିଲେ। ଆଭାସୀ ଜରିଆରେ ୧୩ଟି ଜିଲ୍ଲାର ଜିଲ୍ଲାପାଳ, ଅତିରିକ୍ତ ଜିଲ୍ଲାପାଳ, ଉପଜିଲ୍ଲାପାଳ, ତହସିଲଦାର ଓ ସବ୍‌ରେଜିଷ୍ଟ୍ରାର୍‌ମାନେ ଯୋଗ ଦେଇଥିଲେ।